Humko pataa chalaa ki holi aai, chandaa mangne jab bachon ki toli aai,
Ikyawan rupey ka chuna lagaaya aur kahaa, shaam ko jaroor ana bhai,
Shaam ko hum bhi chal diye gang ke saath, bhaiya ab vasuli ki bari aai,
Vahan par lakadiyaan jal rahin thi aur ladakiyaan pooja karti nazar aain,
Humne bhi bhagwaan ko maska lagaya aur prasad ki aur nazar dodaai,
Makki ke dane, revdi, chiki aur khajur khakar mann ko kuchh shanti aai,
Jala li holi, ab bujhane ke liye agle din dhuleti aur uske sath chhuti aai.
Abhi ankh khuli bhi nahin thi aur baahar se, baahar niklo ki aawaaz aai,
Baahar jhanka to aakraman ki taiyari sang, padosiyon ki fauj nazar aai,
Diwali mein jaise naye kapde, holi mein vaise purani patlun ki yaad aai,
Baahar aate hi hua aisa hamlaa, jaise bhukhe sheron ko billi nazar aai,
Itna rang lagaya sabne ki, apni shakal humein khud hi pehchan na aai,
Aur dost bhi aaye; aur mujhse hi puchhne lage ki, main kaha hun bhai,
Humne bhi thoda-thoda rang lagaya, aur thode rangon ki bachat karai,
Auron ko bhi ranga gaya, jo pyar se baahar na aye unki to shamat aai,
Ek naye padosi ne to, rang lagane se pehle hi pehli bar pehchan karai,
Apne mohalle ke bad sabne socha, baahar huddang macha ayen bhai.
Baahar rangon ke sath bahut kuchh tha; ande, mitti… ityadi ki bari aai,
Log sadkon pe alhad jhum rahe the, holi ki masti charon aur nazar aai,
Chehre pe itna rang tha ki wahin se rang utar kar dusron par ki rangai,
Thak gaye the, bhukh lagi thi; ganne ka ras piya aur khane ki bari aai,
Khaman aur Samose to khaye, par zindagi mein pehli bar bhang khai,
Socha itni si goli se kya hoga, uske upar se pi li pet bhar ke thandaai,
Baug ki pipe se nahaye, bahut acting kari ki mujhe chadh gayi he bhai,
Par goli nahi, yeh to bum ka gola tha; futaa zor se par awaaz nahi aai,
Shareer mein kuchh ajeeb hone laga, jaise sachmuch chadh gayi bhai.
Bhang ki goli ka dekh kar effect, humein badi zoron se ghar ki yaad aai,
Kheli thi humne jo baahar holi, goli ne shareer ke andar wohi holi dikhai,
Ghar aakar jo aina dekha to usne kaha, yeh kiski shakal udhaar le aai,
Humne kaha jale pe namak na chhidko, mithha khane ki ichha hai bhai,
Kaju katri par haath saaf kiya aur socha ki, ab shareer ki kar len dhulai,
Mann halka aur shareer bhari tha, sab dheere dheere ho raha tha bhai,
Kaha behnon se, chad gayi mujhe; bolin acting achhi kar rahe ho bhai,
Dhoop mein utarti he suna tha, dhoop ke liye washroom ki batti jalai,
Tab donon behnon ki samajh me aai, ki sachmuch chadh gayi hai bhai.
Par donon ko bhi thodi chadhi thi, kyonki unhone bhi thodi si thi khai,
Phir kya tha, mil kar mandli jamaai; hans hans kar sari chinta bhagaai,
Kabhi Aamir Khan jaisi tapori acting aur kabhi gaanon ki bauchhar lagai,
‘f’ language behnon ko batai, fir har fentence mein ‘f’ ki barish si aai,
Khud ko acting ka badshah samajh rahe the hum, aur masti thi chhayi,
Jaisa bhi tha achha lag raha tha, gum ki badli dur tak nazar nahi aai,
Jo bhi ho raha tha, vo ho raha tha; koi lagaam hi nahi lag rahi thi bhai,
Hosh tha par ankush nahi; ‘main’ nahi tha, bas hone ka ehsas tha bhai,
Dar sa tha, kya sab yun hi rahega; itni khushi se bhi dar lagta hai bhai,
Yaddasht chali jae ya shayad main pagal ho jaon, ant ki feeling bhi aai,
Kya, kaise pata nahi; dheere dheere do-dhai dinon mein puri jaan aai,
Aur jin doston ne bhang khayi thi, vo mile aur ek dusre ko apbiti sunai.
Iss pure samay ke dauran main khush tha, koi chinta aas paas nahi aai,
Aisa laga jaise yeh tha main, ya hun shayad; kya aisa reh paonga bhai,
Dheere dheere sab pehle sa ho gaya, phir se gamon ne kar di chadhai,
Zindagi mein yeh kaisi holi aai, suna tha par pehli bar bhang ki goli khai,
Holi ko yaadgaar banakar, ek aur bat iss goli ne achhi tarah se samjhai,
Belagaam zindagi badi khatarnaak hai aur ankush kitna zaroori hai bhai,
Khushi ho ya gum, banaye rakho apna sanyam; yeh bat samajh me aai.